♥ اشياء تحتاجينها اذا كنتي مبتدئه في الميك اب ♥

السلام عليكم ♥   

زي ماوعدتكم في سناب تشات اني راح انزل پوست في البلوق عن المبتدئات 

وايش الاشياء اللي لازم تصير عندهم .. طبعاً مو لازم تتقيدون بالمنتجات اللي بالصور

خذو الي يريحكم.

اول شي واهم شي لازم لازززم يكون عندكم برايمر .. وشو البرايمر ؟ زي قاعده تنحط بعد كريم الترطيب وقبل كريم الاساس (الفاونديشن) يخلي المكياج يجلس مده اطول .. طبعاً فيه انواع شي للبشره الدهنيه وشي للجافه اللي بالصوره للدهنيه .. طبعاً كمان من فوائده يقفل المسامات ف يخلي الفاونديشن تحسونه على مستوى واحد + كمان مايخلي الفاونديشن يطلع متكتل ، البشره الجافه برايمرها يختلف بشي واحد تقريباً انو الجافه فيه نسبة ترطيب تخلي الفاونديشن مايجف مره لا طولتي اما الدهنيه يقلل من افراز الدهون .. كيف ينحط؟ بالطبطبه ب اصابعكم مو زي ماتحطون كريم عادي لاااا.

الفاونديشن ♥♥ 
تقريباً هو اهم شي خاصه للي بشراتهم لونها مو موحد لكن للي بشرتهم موحده بس عندها هالات احس اهم شي بيكون الكونسيلر..
اول شي لارم تعرفين وش بشرتك؟ اذا جافه تشترين فاونديشن للبشره الجافه + تختارين درجة اللون اللي تناسبك صح (للاسف معرف كيف تعرفون درجتكم انا الى الان معرف لاني اشتريه اذا سافرت وهناك موظفاتهم يكون معهم ميك اب ارتست ف اخليها هي تختارلي درجتي الصح  بس بتلاقون باليوتيوب كثير متكلمين عن هالشي )

نجي للكونسيلر ♥♥
اللي بالصوره صدق صدق ما ابالغ هذا افضل كونسيلر جربته بلا برولونق وير بلا خرابيط .. فضييييع ولا يتكتل لو حطيتي فوقه زياده مايقلب رمادي ، كثير قالو فيت مي من ميبيلين البديل الارخص له لكن معليش مايُقارن فيه ابد جربته فرررق ! انصحكم فيه حتى لو مبتدأه يستاهل كل ريال ينحط فيه  للامانه♥

 الشي البرتقالي غني عن التعريف .. كوركتور (مصحح ) من ماك وداييم عندهم مخلص في ب ميك اب فور ايفير وفيه ب كريولان كلهم نفس الشي يسوون ، تحطونه قبل الكونسيلر بالطبطبه تاخذون مسحه وحده ب اصبعكم وتطبطبون على الهاله بس لكن احرصو ان قبله تكونون مرطبين تحت عينكم وخلوه ثواني وحطو الكونسيلر.

لازم يكون عندك باليت ايشادو وجامع الوان تناسب مناسبات صباح سهرات طلعات ليل زي كذا .. ويكون فيه الوان مات (مطفيه ) و شيمر (فيها لمعه).
عندكم Lorac فضيييييييييع الوانه حلوه وثابته ماشاءالله و واضحه عالعين صراحه افضل من Naked
احس نيكد خلاص قدم مره صدق فيه اشياء احلى صارت

هذي صوره لالوانه نسيت اصورها جبت صوره من النت

طبعاً ماتوقع فيه بنت ماعندها ماسكارا .. انصحكم ب ذي من ريميل حلوه تطول وتكثف

ايلاينر جاي على شكل قلم من ريميل حلو وسهل استخدامه

لوس باودر ♥♥!!

من الاشياااء اللي ما استغنييي عنها تنحط فوق الكونسيلر ب بيوتي بلندر تطبطبون  تخلونها دقيقتين وتشيلون الزايد بفرشه بوريكم صورتها تحت..

ايش هو اللوس باودر ؟ بودره منثوره ممكن تحطونها فوق الكونسيلر او ب اي مكان ماتبونه يدهن عندكم وتثبت المكياج فتره اطول .. اللي عندي من Translucent - Laura Mercier حلوه ونااااعمه ماتخلي الكونسيلر يخطط تحت عينك وهي نفسها ماتتكتل صراحه اشوفها افضل من بنانا من بن ناي ذي تعطي مظهر طبيعييي وتناسب كل البشرات وعملية عكس بين ناي علبتها تبلشك ماتعرفين شتسوين معها -ــ- 

البلاشر ♥

ينحط عالخد لكن احرصو تخلون مسافة اصبعين من عند خشمكم مايصير على كللل الخد يطلع بششععع.
خذو لون ينفع للسهرات ولون بيطلع لطيف بالصباح .. لاتتقيدون بالصور اي ماركه عادي ♥

هذا اللي اقصده بالاصبعين.

كونتور و هايلايت

اذا انتي مبتدئه افضل انك تاخذين كونتور بودره احسن من الكريمي يحتاجله يد خفيفه بيحوسك
وشو الكونتور؟ لون غامق تحددين فيه وجهك عشان تنحتين فيه وجهك لكن اهمممم شي
 يكون مافيه اي لمعه + احرصو اساسه يكون رمادي يعني مايكون جاي على احمر او پينك

الهايلايت ؟ لمعه تحطينها على عظمة الخد تبرزها بشكل جمييل .. طبعاً الهايلايت هنا اقصد فيه هالنوع ما اقصد هايلايت الي بالجبهه وتحت العين وتحت الكونتور وذا ♥

اللي بالصوره من سليك درجة لايت
انصحكم اشترو زي اللي بالصوره بيكون افتصادي لكم بدال ماتشترون هايلايت لحال وكونتور لحال
عندهم ثلاث درجات اتوقع ( لايت - ميديم - دارك ) كل وحده واللي يناسب وجهها بس حاولو مايكون غامق مره عشان مايطلع شكلك مو طبيعي .. اذا ميزانيتكم تسمح اشترو لاقونا من نارس افضل ب الف مره بس حطيتلكم ذا عشان اقتصادي للي يبون هايلايت وكنتور بوقت واحد.

بودرة الحواجب

اللي بالصوره فضييييعه illamasqua- thunder احسن من حقت بودي شوب وحرام تتقارن فيها
واذا حواجبك خفييفه خذي جل جواجب من انستازيا

المحددات

مهم يكون عندك محدد احس يعطي شكل اجمل للشفايف تحددينها من برا وحتى لا راح الروج يبقى هو
اللي بالصوره من ماك بس زي ماقلتلكم لاتلتزمون بالصور اللي حاطتها كلها خاصه المحدات فيه بدائل كثيره
ورخيصه للامانه ماجربت غير ماك بس عشان اراعي ميزانية الجميع قلتلكم عشان ماتحسبون
لازمم اللي بالصور♥

 الارواج

حاولو يكون عندكم الوان هاديه للصباح الوان لـ الليل اول ثلاث من اليمين حلوين للصباح والليل بعد
مع ان الصوره ظالمتهم عجزت اطلع لونهم الصدقي هم افتح من الصوره (اي روج حسيتو انكم ابتلشتو بلونه طلع غامق طبطبو بنتفففة كونسيلر فاتح على شفايفكم )  الى الان ارواج ماك اشوفها الافضل بعدها انقلوت ماحبيت حقات ريميل ابددداً صراحه :(

فرش الوجه

حاولت اختصرلكم اهمم الاشياء بالفرش

• فرشة بلاشر 
• فرشة توزعون فيها اللوس باودر ( من تحت العين والوجه )
• فرشة للكونتور 

 فرش العين

• فرشة ايشادو
• فرشة حواجب ( E15-Sigma عمليه مره مع انها مو مخصصه للحواجب)
• مشط حواجب ( اي ماركه ماتفرق)
• فرشة دمج ( خذولكم وحده تصير لاكبيره مره ولا صغيره مره اذا مبتدئه مابتحتاجين كثير احس )

* فيه فرشة من انستازيا رقم ١٢ حلوه مررره كمان تختصر عليكم لانها فرشة حواجب + مشط

 بيوتي بلندر ♥♥

لازم لازم لازم لازم كل وحده يصير عندها بيوتي بلندر

• ميني بيوتي بلندر ( لتحت العين والاماكن الصغيره) فضيعه  صرت ماستغني عنها.
• بيوتي بلندر العاديه ( للوجه كامل )

وخلصنا ♥♥

ادري طولت عليكم بس كنت ابي اتكلم بالتفصيل وافيدكم قد ما اقدر باللي اعرفه
ان شاءالله تكونون استفدتو ..

اذكروني بدعوه
احبكم  ♥♥♥♥♥♥